BIR NAFAS - Alisher Muqumov

kod

BIR NAFAS 

(g'azal) 

Qoldirma zulmat qa'rida, kel mohi tobon bir nafas, 

Kech bo'lsa ham "hech" bo'lmasin, kelgin shitobon bir nafas. 

Jabru sitamlar to ba kay, fikrimni qandoq chalg'itay, 

Yonimda bo'l to ki topay dardimga darmon bir nafas. 

O'tmoqda umrim besamar, kutmoqdaman yo'q, hamsafar, 

Ey g'amlarimdan bexabar, kel, ayla shodon bir nafas. 

Sensiz qarodir kunlarim, beintihodir tunlarim, 

Noz etma bo'lgin dilbarim kulbamga mehmon bir nafas. 

Ey xasta dillar marhami, kelgin axir ko'rgani, 

Qoshingda uyg'onsam qani, bo'lsaydi imkon bir nafas. 

Kelgin umidlar shahridan, qutqar judolik zahridan, 

Shafqatsiz olam qahridan, bo'lmay pushaymon bir nafas. 

Ey nozanin, paymonshikan, xo'p de bo'laylik jonu tan, 

Shoyad Alisher qalbidan ketsaydi armon bir nafas. 

/ Muallif: Alisher Muqumov /