ОМОН БЎЛ ДУНЁДА, ОМОН, АЗИЗАМ!

kod

Кундай юриб турган кунлар омонат, 

Сўнмай кулиб турган тунлар омонат, 

Синиқ омонат, бутунлар омонат, 

Бахтимга яхшими, ёмон, азизам, 

Омон бўл дунёда, омон, азизам! 

Ёнимда елкадош турган одамдай, 

Кетсанг ҳам олдимда юрган одамдай, 

Бузсанг ҳам, узсанг ҳам, қурган одамдай, 

Бахтимга яхшими, ёмон, азизам, 

Омон бўл дунёда, омон, азизам! 

Гоҳида бу қўллар етмас фалакмиз, 

Гоҳи чархпалакмиз, гоҳи саракмиз, 

Майли ҳалак бўлдик, майли ҳалакмиз, 

Бахтимга яхшими, ёмон, азизам, 

Омон бўл дунёда, омон, азизам! 

Яхши, ёмон ўтар, ўтмас кун борми, 

Яралар битади, битмас ун борми, 

Бугун Худо ёрдир, эртага ёрми, 

Бахтимга яхшими, ёмон, азизам, 

Омон бўл дунёда, омон, азизам! 

Бу дунёда бебахт сўнмасин десанг, 

Паймонамни бевақт тўлмасин десанг, 

Яхшими, ёмонми, ўлмасин десанг, 

Бахтимга яхшими, ёмон, азизам, 

Омон бўл дунёда, омон, азизам! 

ОМОН БЎЛ ДУНЁДА, ОМОН, АЗИЗАМ!