Сендан на хабар бор...

kod

Айролиқ шамоли суякка етди,

Дилрабо хаёллар тўзғиган оқшом.

Соғинчнинг овози юракка етти

Сендан на хабар бор –

На бирор нишон...

Муаззам нурларга чулғонса гуллар,

Ошиқлар қалбида титраб ҳаяжон.

Ям-яшил рангларда кўринди қирлар

Гулдан на хабар бор, -

На бирор нишон...

Қўл чўзсам, қўлимга сиғмайди ҳаво,

Баландлаб бормоқда кун сайин осмон.

О, менинг баҳорим дилгир, мусаффо,

Кундан на хабар бор, -

На бирор нишон..

Пастроқда учингиз қатор турналар,

Бўғзимга тиқилиб йиғламоққа жон.

Кўзимда қорайиб кетди сурмалар

Тундан на хабар бор, -

На бирор нишон..

Айролиқ шамоли суякка етди,

Дилрабо хаёллар тўзғиган оқшом.

Билолмам хуш онлар қаёққа кетди

Ундан на хабар бор, 

На-да бир нишон...