Севинг сизни севган аёлингизни

kod

Турфа жило билан мисоли товус,
Гўзаллар олса ҳам ҳаёлингизни,
Бедор тонг отгунча кутгучи ҳануз,
Севинг сизни севган аёлингизни.

Сиз деса тилидан сачраб турса бол,
Яшириб яхшию-ёмонингизни,
Оллох санаб турган кўз ёши увол,
Севинг сизни севган аёлингизни.

У борки уйларнинг тўридасиз сиз,
Бир умр бир олмас малолингизни.
Оғзига бир луқма солмаган сизсиз,
Севинг сизни севган аёлингизни.

Тутинг елкангизни азиз бошига
Унга паноҳ қилиб яратган сизни.
Дунёни тўкмангу унинг қошига,
Севинг сизни севган аёлингизни.

Минг битта захарни ютар сизни деб,
Жим кутиб бир ширин каломингизни,
Келинг ўша тоғдек ғурурни эгиб,
Севинг сизни севган аёлингизни!

Толмаган дуои жонингиз қилиб,
Тангридан тиланиб висолингизни.
Келинг номуносиб ёрларни қўйиб,
Севинг сизни севган аёлингизни!