ХАЗРАТИ ИНСОН

Фиръавнни енгган Мусо эмассан,

Гўдак чоғ сўзлаган Исо эмассан,

Қулсан чиранмагин ХУДО эмассан!

Ўзинг билма осмон хазрати инсон.

Бунчалар нолима кўрдингми таҳқир?

Расулимиз бўлган сендан хам фақир

Худо етказяпти ризқингни ахир

Дардинг қилма достон хазрати инсон.

Елкангга филдек айб ортганинг етар,

Фахшнинг ботқоғига ботганинг етар,

Шунча йил ғафлатда ётганинг етар,

Қирoат қил Қуръон, хазрати инсон.

Бир қадам ёшликдан кексаликкача

Бугунги кун бўлгай, эртага кеча

Вақт деган олтинни бехуда соча

Бир кун қилма армон хазрати инсон.

Кеча Худоман деб хайқирган гумрох,

Бугун тобутида жим ётур э, вох.

Дўстинг фақат Аллоҳ, дўст фақат Аллоҳ,

Душманингдир шайтон, хазрати инсон.

Қоғоз заминига экдим сўз кўчат,

Менинг лафзим мухрим, иқрорим хужжат!

Майли қасд қил, қоним заминга сачрат,

Бўлсанг феъли хайвон хазрати инсон!

Нажас еб семирмоқ, каламушга хос,

Бутунни кемирмоқ, каламушга хос,

Туғилдинг... Яша.. Ўл.. Инсонларга мос

Гарчи эмас осон, хазрати инсон.

Осмон фаришталар қоқётган супра

Қор ерга сочилган қалин бир упа

Буғдой умид қилма экканча арпа

Ва бўлмагин ёмон хазрати инсон

Бошинг бўлсин омон хазрати инсон