Кимни кўрма, бугун қўшиқчи.

kod

Тўй ярашар юрт бўлса обод, 

Куй ярашар кўнгил бўлса шод. 

Аммо ёмон кўпайди, ҳайҳот –

Кимни кўрма, бугун қўшиқчи. 

Ёши ўтган раққоса борми, 

Режессёрми ёки актёрми, 

Заргар, табиб, ҳатто атторми, 

Кимни кўрма, бугун қўшиқчи. 

Кимлар эди кеча сухандон, 

Бугун улар ҳофизу хушхон. 

Қўшиқчида кўпми шараф-шон, 

Кимни кўрма, бугун қўшиқчи. 

Дуппа-дуруст шоир, даҳолар, 

Ҳофизман деб қилар даъволар. 

Ўзи куйлаб, ўзи баҳолар, 

Кимни кўрма, бугун қўшиқчи. 

Қолиб кетди бир четда кетмон, 

Қўшиқ айтар тўйма-тўй деҳқон. 

Ашулачи боғбон-у чўпон, 

Кимни кўрма, бугун қўшиқчи. 

Куйлар бугун жўшиб ташмачи, 

Куйлар безори-ю ўғри, босмачи. 

Куйлар ҳатто бузуқ, қўшмачи, 

Кимни кўрма, бугун қўшиқчи. 

Билмас нима дегани – Устоз, 

Билмас нима соз, овоз, пардоз. 

Яна ўшалар зўр, ўшалар мумтоз, 

Кимни кўрма, бугун қўшиқчи. 

Қабрида тик турар Маъмуржон, 

Суяклари қақшар Жўрахон. 

Лол-у ҳайрон эмиш Комилжон, 

Кимни кўрма, бугун қўшиқчи. 

Каримберди Тўрамурод