БЕНАМОЗГА НИМА БОР ҲАЖДА?

Ҳожи бўлди аммо қайтгач хам,

Пешонаси кўрмади сажда.

Намозхонлар навбат кутган дам,

Бенамозга нима бор Ҳажда?

Гапни бурмам ноаниқ ёққа,

Ё қарони менгзамам оққа,

Кимлар қилур ортидан соққа,

Бенамозга нима бор Ҳажда?

Пора бериб Умрага хар чоқ.

Уч бор бормиш ювуқсиз машшоқ,

Лек ўн йиллаб кутди бир қашшоқ,

Бенамозга нима бор Ҳажда?

Шиор хам зўр қойил қоламан,

"Қудам борди мен хам бораман"

Риёкор-чун ичи қораман,

Бенамозга нима бор Ҳажда?

Эмасдирман эртак тўқиган,

Ё қуш иғво донин чўқиган.

Ҳажга борсин намоз ўқиган,

Бенамозга нима бор Ҳажда?

Ибодатни кимки пуллаган,

Кўкармаган ёҳуд гуллаган.

Жавоб берсин бир тўда "лаган"

Бенамозга нима бор Ҳажда?

Савоб номли қопи тўлмаса,

Ният Хақ ризоси бўлмаса.

Ўзгармаса, бўлса васваса,

Бенамозга нима бор Ҳажда?